२०८१ बैशाख १२ गते बुधवार

हात्तीपाइले रोगको उच्च जोखिममा बाँके

बाँके,फागुन ५ । बाँके जिल्ला हात्तीपाइले रोगको उच्च जोखिममा रहेको पाइएको छ। स्वास्थ्य कार्यालयका प्रमुख सुनिता पौडेलले जिल्लामा हात्तीपाइले रोगको जोखिम बढी भएकाले निवारणका लागि अभियान चालिएको बताए।

उनले अभियानलाई प्रभावकारी बनाउन सबैको महत्वपूर्ण भूमिका हुने भएकाले यस अभियानलाई सफल बनाउन सबैलाई आग्रह गरे। रोग निवारणका लागि हात्तीपाइलेविरुद्धको औषधि सेवन एक मात्र उपाय भएको स्वास्थ्य कार्यालयका स्रोत व्यक्ति दुर्गा गौतमले जानकारी दिए।

खानेले औषधि खाइरहने र नखानेले औषधि नखाइदिने गरेका कारण हात्तीपाइले रोगविरुद्धको अभियान प्रभावकारी हुन नसकेको उनको भनाइ थियो।

यो अभियान यही फागुन ११ देखि सुरु हुँदै छ। यस पटक जिल्लामा छ लाख १६ हजार छ सय ९५ जनालाई औषधि खुवाउने लक्ष्य रहेको स्रोत व्यक्ति गौतमले जानकारी दिए। उनले गर्भवती र सुत्केरी बाहेक सबैलाई औषधि सेवन गर्न आग्रहसमेत गरे। नेपालगञ्ज उपमहानगरपालिकामा एक लाख ७० हजार पाँच सय ९८ जना, कोहलपुर नगरपालिकामा एक लाख दुई हजार नौ सय चार जना, खजुरा गाउँपालिकामा ६५ हजार तीन सय सात जनालाई औषधि खुवाउने लक्ष्य छ।

त्यसैगरी जानकी गाउँपालिकामा ४७ हजार सात सय ३३, डुडुवा गाउँपालिकामा ४४ हजार एक सय ४४, नरैनापुर गाउँपालिकामा ४४ हजार आठ सय सात, बैजनाथ गाउँपालिकामा ७१ हजार आठ सय ६१ र राप्तीसोनारी गाउँपालिकामा ६९ हजार तीन सय ४१ जनालाई औषधि खुवाइने भएको छ।

अहिलेसम्म नेपालगञ्ज उपमहानगरपालिकामा ५० प्रतिशत, कोहलपुर र डुडुवामा ७८, खजुरामा ७६, राप्तीसोनारी र बैजनाथमा ७३, नरैनापुरमा ७४, जानकी गाउँपालिकामा ८० प्रतिशतले औषधि सेवन गरेको स्वास्थ्य कार्यालय बाँकेले जनाएको छ। जिल्लामा आर्थिक वर्ष २०६७र६८ बाट हात्तीपाइले रोग विरुद्धको औषधि खुवाउन सुरु गरिएको थियो।

उक्त वर्ष जिल्लाको कभरेज ९१ प्रतिशत थियो। गत वर्ष बाँकेमा ६८ प्रतिशतले मात्रै औषधि सेवन गरेका थिए। बाँके हात्तीपाइले रोगको उच्च जोखिममा रहेकाले औषधि सेवन नै यसको न्यूनीकरण भएको स्वास्थ्य कार्यालयका प्रमुख पौडेलले बताए। उनले पाँच वर्ष लगातार औषधि खुवाएपछि ‘प्रि टाक्स सर्भे’ गरेर अर्को वर्ष औषधि खुवाएर निवारण गर्ने रणनीति असफल भएकाले १३औँ पटक औषधि खुवाउन लागिएको बताए।

प्रकाशित मिति : २०७९ फाल्गुन ५ गते शुक्रवार
प्रतिक्रिया दिनुहोस

Leave a Reply

Your email address will not be published. Required fields are marked *