२०८१ असार २९ गते शुक्रवार

३ दिनदेखि स्वास्थ्य केन्द्रमा ताला र काँडेबार

रुकुम पश्चिम,साउन २९ । आधारभूत सेवाअन्तर्गत पर्ने स्वास्थ्य सेवा प्रवाह गरिरहेको एक स्वास्थ्य केन्द्रमा तालाबन्दी गरिँदा तीन दिनदेखि बन्द अवस्था रहेको छ ।

चौरजहारी नगरपालिका ८ लयटामा रहेको आधारभूत स्वास्थ्य सेवा केन्द्रमा गएको शुक्रवारदेखि तालाबन्दी गरिएको हो ।

स्वास्थ्य सेवा केन्द्रमा कार्यालय सहायोगी राख्ने विषयमा जग्गाधनीले विवाद गरेर तालाबन्दी गरेका हुन् । स्वास्थ्य केन्द्र प्रमुख तिलक लामिछानेका अनुसार शुक्रवारदेखि नै कार्यालयमा ताला लगाउनुका साथै कार्यालय जाने बाटो बन्द गरिएको छ ।

कार्यालयको ढोकामा ताला, कार्यालय वरिपरि काँडा र तारबार लगाएर बन्द गरिएको लामिछानेले बताए ।

शुक्रवार सार्वजनिक बिदा भएकोले कर्मचारी नआएका र आइतवार कार्यालय आउँदा बन्द देखिएपछि नगरपालिकामा खबर गरिएको स्वास्थ्य केन्द्र प्रमुख लामिछाने जनाए। कार्यालयको गेटमा र मूल ढोकामा ताला लगाईएको छ ।

स्वास्थ्य केन्द्रको जग्गा उपलब्ध गराएका स्थानीय बलवीर पुन र उनको परिवारले कार्यालय सहयोगी आफ्नो मान्छे नराखेको भन्दै तालाबन्दी गरेका हुन् ।

जग्गादाताको परिवारलाई उपेक्षा गर्दै स्वास्थ्य केन्द्रको कार्यालय सहयोगीमा नगरपालिकाले अर्को मान्छे नियुक्ति गरेको भन्दै तालाबन्दी गरेको उनीहरूले जनाएका छन् ।

नगरपालिकाले स्वास्थ्य केन्द्रको कार्यालय सहयोगोयीको रूपमा स्थानीय सिर्जना घर्ती मल्ललाई नियुक्त गरेर पठाएको थियो ।

स्वास्थ्य केन्द्र बन्द भएपछि उपचारका लागि आएका बिरामीले सास्ती पाएका छन् । स्वास्थ्य केन्द्र बन्द भएको देखेपछि बिरामी बाध्य भएर चौरजहारी जान थालेका छन् ।

बिहानै आएका ज्वरो र रुघाखोकीका पाँच जना बिरामी फर्किएका स्थानीयवासीले बताएका छन् । स्वास्थ्य केन्द्रको तालाबन्दी खुलाउनका लागि वडा कार्यालयले पहल गरिरहेको बताइएको छ ।

प्रकाशित मिति : २०७९ साउन २९ गते आइतवार
प्रतिक्रिया दिनुहोस

Leave a Reply

Your email address will not be published. Required fields are marked *