तुलसीपुर, बैशाख १४ । नेपाली काँग्रेस नेता डिल्लीबहादुर चौधरी लुम्बिनीको मुख्यमन्त्रीमा नियुक्त भएका छन् ।
बिहीबार दिउँसो ५३ जना सांसदको हस्ताक्षरसहित मुख्यमन्त्रीमा दाबी पेश गरेका चौधरीलाई प्रदेश प्रमुख अमिक शेरचनले संविधानको धारा १६८ को उपधारा २ अर्थात बहुमतको आधारमा मुख्यमन्त्रीमा नियुक्त गरेका हुन ।
यो संगै उनी लुम्बिनी प्रदेशको चौथो मुख्यमन्त्री बन्न सफल भएका छन् ।
बिहीबार दिउँसो साढे १ बजेतिर दाङको निर्वाचन क्षेत्र नं. ३ (१) बाट निर्वाचित चौधरीले प्रदेश प्रमुख शेरचन समक्ष प्रदेश सभाका बहुमत सांसद ५३ जनाको हस्ताक्षरसहित मुख्यमन्त्रीमा दाबी पेश गरेका थिए ।
त्यसैका आधारमा बिहीबार बेलुका प्रदेश प्रमुख शेरचनले चौधरीलाई मुख्यमन्त्रीमा नियुक्त गरेका हुन ।
प्रदेश प्रमुख शेरचनले बैशाख १२ गते संविधानको धारा १६८ को उपधारा २ अर्थात बहुमतको आधारमा नयाँ सरकार गठनको लागि बिहिबार दिउँसो ४ बजेभित्र दावी पेश गर्न समयसीमा दिएका थिए ।
मुख्यमन्त्रीका रुपमा चौधरीले शुक्रबार बिहान साढे ११ बजे सपथ लिने भएका छन् ।
