काठमाडौं, असोज ३। दलहरूले आज प्रतिनिधि सभा र प्रदेश सभा समानुपातिकतर्फ उम्मेदवारको बन्दसूची निर्वाचन आयोगमा बुझाउँदै छन् ।
आयोगले मंसिर ४ गते हुने प्रतिनिधि सभा र प्रदेश सभा चुनावका लागि आइतबार र सोमबारका लागि बन्दसूची बुझाउन समय दिएको छ।
सोही अनुसार नेपाली कांग्रेस, नेकपा एमाले, नेकपा माओवादी केन्द्र, नेकपा एकीकृत समाजवादी, जसपा, लोसपा, राप्रपालगायत दलले आयोगमा बन्दसूची बुझाउने तयारी गरेका छन् ।
प्रतिनिधि सभातर्फ नेपाल समावेशी पार्टी र तराई मधेश लोकतान्त्रिक पार्टीले मात्रै आइतबार बन्दसूची बुझाएका थिए।
नेपाली कांग्रेसले समानुपातिक उम्मेदवारको अझैं अन्तिम टुँगो लगाएको छैन । माओवादीले महासचिव देव गुरूङको नेतृत्वमा कार्यदल गठन गरेको छ ।
त्यस्तै सचिवालय बैठक मार्फत एमालेले आइतबार प्रतिनिधि सभातर्फ ११० र प्रदेश सभातर्फ २२० जना समानुपातिक उम्मेदवार छनौट गरी बन्दसूची तयार गरेको थियो।
