पाल्पा,साउन २० । जिल्ला प्रशासन कार्यालय, पाल्पाले साउन २९ गते सम्मका लागि आफ्ना सेवाहरु बन्द गरेको छ ।
कर्मचारीमा कोरोना संक्रमणको पुष्टि भएपछि शान्ति सुरक्षा, विपद् व्यवस्थापन र मुद्दा तथा ठाडो उजुरी बाहेकका सम्पूर्ण सेवाहरु बन्द गरेको हो ।
प्रशासनमा कार्यरत नौ जना कर्मचारीको कोरोना परीक्षणमा पाँच कर्मचारीमा संक्रमण पुष्टि भएपछि सेवाहरु बन्द गरिएको प्रशासनले जनाएको छ ।
पाल्पामा कोरोना संक्रमणको जोखिम रहिरहेकाले स्वास्थ्य मापदण्डको पालनामा जोड दिन समेत जिल्ला प्रशासन कार्यालयले आग्रह गरेको छ ।
कोरोना संक्रमितको संख्या पछिल्लो समय बढ्दै गएको स्वास्थ्य कार्यालय पाल्पाले जनाएको छ । अहिले पाल्पामा तीन सय ९५ जना सक्रिय संक्रमित रहेका छन् ।
प्रकाशित मिति : २०७८ साउन २० गते बुधवार
